VETA Yabuni Bajaj Maalum ya Kufagia Barabara kwa Teknolojia ya Kisasa

Na Mwandishi Wetu

MAMLAKA ya Elimu na Mafunzo ya Ufundi Stadi (VETA), kupitia Chuo cha VETA Chang'ombe, imebuni pikipiki ya magurudumu matatu (Bajaj) yenye teknolojia ya kisasa ya kufagia barabara, ubunifu unaolenga kuongeza ufanisi katika usafi wa miji na kupunguza gharama za usafi wa mazingira.

Akizungumza katika Banda la VETA kwenye Maonesho ya 50 ya Biashara ya Kimataifa ya Dar es Salaam (Sabasaba), yanayoendelea katika Viwanja vya Mwalimu Julius Kambarage Nyerere jijini Dar es Salaam, Mwalimu wa Chuo cha VETA Chang'ombe, Emmanuel Bukuku, amesema kifaa hicho kina uwezo wa kufagia barabara urefu wa kilomita mbili kwa saa moja.

Bukuku amesema mashine hiyo imeundwa kwa mfumo unaokusanya vumbi, mchanga na taka ndogondogo wakati wa kufagia na kuzipeleka kwenye sehemu maalumu ya kuhifadhi, hivyo kuacha barabara zikiwa safi na salama kwa matumizi.

Ameeleza kuwa ubunifu huo unaweza kuwa suluhisho kwa halmashauri, manispaa na majiji nchini katika kuboresha huduma za usafi wa barabara kwa kutumia teknolojia ya ndani, badala ya kutegemea nguvu kazi kubwa ya watu pekee.

"Teknolojia hii imeundwa na wataalamu wetu wa VETA kwa kuzingatia mahitaji ya mazingira ya Tanzania. Inaongeza ufanisi, inapunguza muda wa kufanya usafi na inaweza kusaidia kupunguza gharama za uendeshaji wa shughuli za usafi katika mamlaka za serikali za mitaa," amesema Bukuku.

Aidha, amesema Chuo cha VETA Chang'ombe kipo tayari kupokea maombi kutoka kwa taasisi za umma na binafsi kwa ajili ya kutengeneza vifaa hivyo kulingana na idadi na mahitaji ya mteja, hatua inayolenga kuendeleza matumizi ya teknolojia za ubunifu zinazotengenezwa nchini.