TRA YAKUSANYA TRILIONI 15.9 KWA MWAKA WA FEDHA 2018/19

Na Karama Kenyunko, Michuzi Tv

MAMLAKA ya Mapato Tanzania (TRA), imekusanya Sh. trilioni 15.9 kwa mwaka wa fedha 2018/2019 ,kuanzia Julai Mosi mwaka 2018 hadi Juni 30,2019  kati ya lengo la Sh. trilioni 18.

Hayo yamesemwa leo Julai 31,2019  jijini Dar es Salaam na  Kaimu Mkurugenzi wa Huduma na Elimu kwa Mlipakodi, Richard Kayombo wakati akitoa taarifa ya makusanyo ya kodi kwa kipindi cha mwaka wa fedha 2018/2019.

Amesema katika robo ya nne ya mwaka huo wa fedha (Machi hadi Juni 2019), TRA ilikusanya Sh trilioni 1.1, Sh trilioni 1.2 na Sh trilioni 1.5 kwa mwezi Aprili, Mei na June.

Kayomb amesema katika mwaka huo wa fedha, Serikali ilianzisha mfumo wa stempu za Kodi za Kieletroniki (ETS) ambapo utekelezaji wake umefanyika kwa awamu mbili.

"Awamu ya kwanza, ilihusisha bidhaa za sigara, mvinyo, pombe kali, bia na Ain's zote za vileo, ambayo ilianza kutekelezwa Januari 15,2019 imeendelea vizuri na maandaalizi ya awamu ya pili ya utekelezaji wa ETS inayojumuisha bidhaa za vinywaji baridi, maji, juisi na bidhaa za filamu kama CD/DVDs," amesema Kayombo

Kayombo amesema mfumo huo wa ETS kwa awamu  ya pili unatarajiwa kuanza kufanya  kazi Agosti Mosi, 2019, kwa lengo la kukusanya kodi stahiki.

"Lengo Kuu la kubandika stempu hizi za kieletroniki ni kuongeza usimamizi na ufanisi wa ukusanyaji wa ushuru wa bidhaa ikiwa  ni pamoja na kupata taarifa sahihi za uzalishaji viwandani ili kukusanya kodi stahiki,

" Ni matumaini ya TRA, wazalishaji, waingizaji, wasambazaji, wauzaji wote wa bidhaa zinazotozwa ushuru wa bidhaa pamoja na umma wataendela kutoa ushirikiano wa TRA ili kufanikisha utekelezaji wa mfumo huu kila mmoja kutimiza majibu wake kwa majibu wa sheria, kanuni na taratibu zilizopo,"amesema